Manipur : Tribal MLA-in beih a tawk, damdawi-inah dah a ni State sorkarin 'shoot at sight' order a tichhuak
Manipur-a tribal leh Meitei-te inkara buaina chhuak kal zelah, Ningani khan Imphal-ah BJP tribal MLA Vungzagin Valte chu mipuiin kut an thlak a, hliam na tak tuarin RIMS-ah dah luh nghal a ni.
Pherzawl district-a Thanlon MLA, Vungzagin Valte hi Kuki hnam niin, BJP sorkar hmasaah khan tribal affairs & hills minister a ni. Ningani khan chief minister N Biren Singh nen meeting an nei zo, state secretariat aṭanga a haw lam chu kawng lakah Meitei hoin an lo bei a ni.
Manipur-a non-tribal Meitei hnam Scheduled Tribe (ST) status pek tum duh lohna lantirin Nilaini khan All Tribal Student Union Manipur (ATSUM) huaihawta hill district 10-a 'Tribal Solidarity March' neih a ni a, Churanchandpur district-a Torbung area-ah tribal leh non-tribal te inkarah buaina nasa tak chhuakin, in leh dawr bakah, biak-in te hal a ni. Buaina hi valley district lamah kangkai zelin, state pumin an buai zui.
Army leh Assam Rifles sipai ṭhahnem tak tualchhung buaina thlenna hmunahte dah nghal an ni a, state sorkar pawhin buaina zual zel tur venna atan buaina siamtute kah phalna, 'shoot at sight' order Ningani khan a tichhuak bawk.
Thu dik tawk lo thehdarh a, boruak ṭha lo zawk thlen tur venna atan state pumah mobile internet service tih tawp a ni a, a hnuah broadband service pawh tihtawp a ni ve leh.
Buaina chhuahna hmuna chengte chu Army leh Assam Rifles-ten hruai chhuakin, hmun him lamah an dah a ni. Civil mi 7,500 vel chu sipaite hmun leh, sorkarin hmun hrang hranga awmna tur a ruahmanah an khawsa mek. Churanchandpur leh buaina nasatna zualna hmunahte sipaite hian flag-march an nei chhunzawm reng a ni. Sipaite chuan mipuite chu thu leng vakte awih lo tur leh, official-te thuchhuah chauh ring turin an chah.
Tualchhung buaina thleng vang hian Northeast Frontier Railways pawhin Manipur-a rel service a titawp. State chhung boruak a ziaawm hma chu Manipur-ah rel tlan luhtir a ni dawn lo tih NR Railways-a CRRO Sabyasachi De chuan a sawi.