NCP Committee-in Party hotu aṭanga Sharad Pawar banna pawm lo

National Congress Party (NCP) president aṭanga Sharad Pawar a ban hnua party hruaitu thar ruat tura committe din chuan Pawar banna an pawm lo tih an sawi.

May 2-a party president aṭanga a ban tur thu a puan hnuah, Pawar hian president thar ruattu tur committee hi a din a, member-ah Ajit Pawar, Supriya Sule, union minister hlui Praful Patel leh Chhagan Bhujbal-te a dah.

Nimin khan committee hian meeting neiin, party president aṭanga Sharad Pawar banna chu an pawm loh thu resolution an pass tih party vice president leh committee convenor, Praful Patel chuan a sawi. "Kan resolution pass nen Pawar pawh hi hmuin, a thutlukna siam tawh chu ngaihtuah ṭha leh turin kan ngen dawn a ni," a ti.

Meeting an neih lai hian NCP worker tam tak chu Pawar bang lo tura an duhna thuziakte kengin an lo pungkhawm bawk a ni.

Sharad Pawar hian rinlawk loh deuhin, May 2 khan kum 1999-a an lo din, NCP president a nihna ṭanga ban tur thu hi a puang a ni. Hemi rual hian politics erawh chawlhsan a la tum lo tih a sawi nghal bawk.

Kum 2024 Lok Sabha inthlanpui lo awm tur atana eptu party-ten ṭangrual pawl siam tuma hma an lak chhoh mek karah, Pawar-a'n NCP hotu a nihna aṭanga banna a thehluh hi eptu party dangte pawhin an ngaihven a, a thutlukna hi sut leh turin a ngen hlawm a ni. Jammu and Kashmir chief minister hlui Farooq Abdullah, DMK hruaitu leh Tamil Nadu chief minister M Stalin, CPI(M) leader Sitaram Yechuri, Aam Aadmi Party (AAP) hruaitu Sanjay Singh, CPI hotu D Raja-te pawhin Pawar hi an be tawh a ni.

Hetih lai hian Pawar hian a thultlukna siam tawh hi sut mai a tum rih lo niin a lang. Ningania party member-te hmaa thu a sawiah thutlukna siam harsa tak a ni a, party worker-te pawh sawipui tur a ni, mahse an pawmpui a rin loh avangin, midang rawn loin thutlukna chu a siam ta mai tih a sawilang a ni.