Meghalaya-in zirlaite hruai chhuak

Meghalaya sorkar chuan nimin aṭang khan tualchhung buaina thlen mekna, Manipur aṭangin Meghalaya mi zirlai awmte a hruai chhuak.

Chief minister Conrad K Sangma hoin Ningani khan emergency meeting neih a ni a, zirlai ṭhenkhatte pawh biain hruai chhuah dan an ruahman a ni. Manipur-ah hian Meghalaya mi zirlai 200 vel an awm mek a ni. CM chuan zirlai leh an nu leh pate tan helpline number siamin, hemi hmang hian an harsatna tawhte pawh sorkarah an thlen reng thei a ni, a ti.

Imphal-ah Agriculture University and Food Technology Institute-ah Meghalaya aṭanga kal zirlai 60 leh Shillong Lajong football team member 25 an awm a ni. Heng mite hruai hawna tur hian Meghalaya sorkar chuan Prime Minister Office, Ministry of Home Affairs, Director-General of Assam Rifles, Ministry of Civil Aviation leh private airlines-te nen thawkhoin special flight hi an buatsaih tih a sawi. Nimin chawhnu khan zirlai 25 chuang chu Guwahati kaltlangin Meghalaya-ah hruai haw an ni a, zirlai 60 dang phurh hawna tur speical bus pawh ruahman a ni tawh bawk.