Kristian hruaituten sorkar laipui puihna ngen

India rama Kristian sakhaw hruaitute chuan Manipur buaina thlengah Kristian biak-in eng emaw zat hal leh suasam a ni a, Kristian-te thlabar takin an awm a ni tiin sorkar laipui puihna an ngen.

Tualchhung buaina chhuak vang hian Kristian biak-in 50 chuang beih a nih thu leh, Kristian 5,000 chuang zet chu hmun him lamah an tlanchhiat tawh thu Imphal-a kohhran hruaitute chuan an sawi.

Meitei-te hi a tam zawk chu Hindu niin, tribal-te hi a tam ber Kristian an ni thung. Manipur-ah hian Kristian hi 41.29% an awm. Buaina chhuah chhan hi Meitei-te ST status pek tum chungchang a nih laiin, Kristian-te hmun pawimawh beih a ni chu sakhaw lam thil inrawlhah mi ṭhenkhat chuan an ngai. Hindu Meitei-te hian tribal-te biakin chauh ni lo, Meitei Kristian biak-in te pawh an bei tel vek nia sawi a ni.

Bangalore-a Archbishop Peer Machado chuan buaina chhuakah Kristiante bitum an ni chu pawi a tih thu a sawi. Archbishop hian India ram chhunga Kristiante chunga tharum thawhna thleng fo chungchangah Supreme Court-ah petition pawh a lo thehluh tawh a ni. Kristian pawl hrang hrang chuan Manipur-a Kristian sakhaw hun pawimawhte beih leh suasam a ni chu pawi an tih thu leh, an dem thu an sawi.