J&K-a firfiakte laka beihpui thlaknaah sipai 2 an thi

Jammu and Kahsmir-a Rajouri district-a Kandi ramhnuaiah nimin khan firfiakte laka beihpui an thlaknaah, firfiakte bomb tihpuahah sipai pahnih an thi a, midang pali an hliam bawk.

Indian Army Northern Command-in a tarlan danin, thla hmasa lama Bhata Dhurian-a army truck ambush-naa tel firfiak ṭhenkhat an awm thu an dawn bawhzuiin, Kandi ramhnuaiah hian beihpui an thlak a ni. Nimin zing dar 7:30 vel khan firfiakte bihrukna puk hi panin, firfiakte hian an bomb kam an lo tipuak a ni. Sipai hliam tuarte hi Dhampur-a Command Hospital-ah enkawl an ni.

April 20-a Poonch district-a Bhat Dhurian-a army truck ambush-naah khan sipai panga an thi a, a beitu firfiakte hian an sipai thahte silai leh a mute chu laksakin an tlanbo zui a ni. Pawikhawihtute man tum hian sipaite chuan ngawrh takin beihpui an thlak zui a, mahse man erawh an la nei lo.