Sharad Pawar-a'n NCP President aṭanga ban a tumna sût

National Congress Party (NCP) president Sharad Pawar chuan party president a nihna aṭanga a ban tur thu a puang aṭanga ni li, Inrinni liam ta khan a thutlukna a sut leh thu a sawi.

Sharad Pawar chuan an party worker leh eptu pawl dang hruaitu hrang hrangte ngenna avangin a thutlukna siam tawh chu a sut leh tih a sawi a ni.

Pawar hian NCP president aṭanga a ban tur thu a puan hnuah, amah thlaktu ruat turin committee a din nghal a, mahse he committee hian Pawar banna hi an pawm thei lo tih sawiin resolution an siam zui a ni. Pawar chuan party president aṭanga ban chungchang a ngaihtuah pawh khan an party hruaitu leh worker-te pawh a rawn lo a, rem an tihpui dawn lo tih a hriat avangin amahin thutlukna a siam ta mai niin a lo sawi tawh a ni.

"Heti takin ka ban tumna hian kan party mi leh sate a ṭhawng ang tih ka lo hre lo a, national-level hruaitu tam takin ka thu sut turin min ngen bawk. Kum khat hnuah inthlanpui kan hmachhawn mai dawn a, hei vang hian lo inthiarfihlim hi a ṭha ber lo a ni. Eptu ṭangrual siam turin kan bei zel dawn a ni," a ti.

Union minister hlui, kum 82 mi Pawar hi an party chhungah hel an awm avangin kum 24 zet party hruaitu dinhmun a lo chelh tawh hi bansan a tum nia sawi pawh a awm. Pawar-a tupa, politics lamah pawh amah thlaktu tura ngaih, Ajit Pawar chu party chhungah lungawi loin, NCP MLA ṭhenkhat nen BJP zawm an tum niin thuthang a awm hman. Mahse Ajit chuan NCP chhuahsan a tum loh thu leh, a damchhunga a awm tur thu a sawi.

Pawar chuan party president dinhmun chu chelh chhunzawm leh mah se, amah thlaktu tura ruahmanna lo neih lawk chu a ngaihdan a la ni reng tih sawiin, "Kan pawl kalphungte siamṭhat a, mawhphurhna tharte siam a, hruaitu thar tur buatsaih chu ka ngai pawimawh tur an ni," a ti.