Ashok Gehlot-a'n Karnataka-a PM Modi campaign khap turin ECI a ngen

Rajasthan chief minister Ashok Gehlot chuan Karnataka assembly inthlan lo awm turah, prime minister Narendra Modi chu sakhaw behchhana vote zawngah puhin, Election Commission of India (ECI) hnenah PM campaign hi khap turin a ngen.

Gehlot chuan, "Dan pawh chhiar rawh u, mi tupawhin sakhua hmanga vote a zawng a nih chuan, inthlana a campaign hi khapsak a ni tur a ni," tiin a sawi. PM Modi chuan EC guidelines bawhchhiain, sakhua behchhana hmangin vote a zawng a, a campaign chhunzawm zel hi phalsak a ni tur a ni lo, a ti.

Hei bakah hian BJP candidate pakhatin Congress president Mallikarjun Kharge leh a chhungte a nuaibo dawn ti zawnga vauna ṭawngkam a chhakchhuak chu a dem thu a sawi bawk.

Karnataka Pradesh Congress Committee (KPCC)-in ECI-a complaint an thehluhah, PM Modi hian rally a neihnaah vote zawnna atan Hindu pathiante hming a hmang a ni, an ti. Congress party manifesto haltu, BJP minister hlui KS Eshwarappa lakah pawh complaint an thehlut bawk a ni.