J&K : Ruihhlo khawih awm zat hriat nan color-coding hmang dawn

Zirchianna neihah Jammu and Kashmir-ah ruihhlo ngawlvei mi maktaduai khat dawn an awm thu leh, ṭhalai zingah ruihhlo ti an pung zel tih tarlan a nih hnuin, Kashmir Valley-a deputy commissioner zawng zawng chu an district chhung khaw tin chu ruihhlo ti awm zat azira color-coding ti turin hriattir an ni.

Kashmir divisional commissioner Vijay Kumar Bhiduri chuan, deputy commissioner 10-te chu an district-a khaw hrang hrangte chu ruihhlo ti awm zat ang zelin rawng (color) hmanga chhinchhiah turin a hriattir. Color hi chi thum - a hring, a eng leh a sen hman a ni ang. Ruihhlo ti ṭhinten building ruakte chu thil ṭha lo tihna atana an hmang ṭhin a nih chuan, heng in ruakte chu a hnaih ber department-te hnena hman tir a, dah ruak lo turin DC-te chu hrih an ni bawk. Building ruakte chu thil ṭha lo tihna atan hman a ni ṭhin em tih enfiah fo turin official-te chu a hrilh.

Ministry of social justice and empowerment-in National Drug Dependence Treatment Centre (NDDTC), AIIMS New Delhi kaltlanga National Survey on Extent and Pattern of Substance Use in India a neihah, Jammu and Kashmir-ah hian ruihhlo ngawlvei, drug addict hi maktaduai khat dawn an awm a ni. Ruihhlo ti ṭhin zinga a tam ber hi kum 17-33 inkar niin, chawhrualin mi pakhatin thla khata ruihhlo leina atana a sum sen hi Rs 88,183 a tling.