Central agency office leh police station-ah thla 3 chhunga CCTV dah turin hriattir

Supreme Court chuan sorkar laipui hnenah kum 2020, December thlaa thupek a lo tihchhuah tawh angin, thla thum chhungin central investigative agency office leh police station-ah CCTV dah vek turin a hriattir.

Court chuan mihring dikna chanvo neihte humhalh leh, rorelna langtlanga kalpui a nih theihna turin CCTV hi dah vek turin a lo ti tawh a ni. Justice BR Gavai kaihhruai bench chuan court-in thupek a lo tihchhuah tawh, tun thlenga agency tam takin an lo la zawm lo chu a lungawi thlak loh hle tih a sawi bawk. He thupek hi Union Territory pahnih - Andaman and Nicobar Islands leh Ladakh bakah, state pahnih - Mizoram leh Goa chiahin la zawmin, an budget-ah telhin CCTV camera-te pawh an dah tawh a ni, a ti.

Kum 2020, December thla khan justice Rohinton Nariman (retired) kaihhruai judge pathum awmna bench chuan, sorkar laipui leh state sorkar hnenah Central Bureau of Investigation, National Investigation Agency, Enforcement Directorate, Narcotics Control Bureau, Department of Revenue Intelligence, Serious Fraud Investigation Office bakah, mi man theihna leh thu zawhfiah theihna power nei agency dang office-ah CCTV leh recording equipment-te dah vek turin a lo hriattir tawh a ni.

Court chuan CCTV-te hi July 18 hma ngeia dah vek turin nimin khan a hriattir a, sorkar laipuiin he thupek hi a zawm dawn loh chuan affidavit thehlut a, hearing neihah an zawm loh avanga an laka action lak a nih lohna tur chhan sawifiah turin court-in Secretary (Home) a inlan ngei a ngai tih a sawi bawk.