Rajasthan-a chenna inah MiG-21 fighter jet a tla, mi 3 an thi

Indian Air Force MiG-21 fighter aircraft chu nimin khan Rajasthan-a thingtlang khaw pakhata chenna inah a tla a, mi pathum an thi a, hliam pathum an awm bawk.

He aircraft hi routine exercise nei turin Suratgarh airbase aṭangin a thlawk chhuak a, a khawl lam fel loh vangin nimin zing dar 9:45 vel khan Hanumangarh-a Bahlol Nagar-a in pakhat chungah a tla a ni. He ina awm mi pathum an thi. Pilot hi thlawhtheihna tlak hma hian a inkhawhchhuak hman a, Suratgarh base aṭanga km 25 vela hlaah hmuh niin hliam na vak lo a tuar.

Kumin January thla khan IAF fighter jet pahnih, Sukhoi Su-30 leh Mirage 2000-te chu Rajasthan-a Bharatpur-ah training exercise an neih laiin an lo tla tawh a, kum 2022 khan twin-seater MiG-21 fighter jet hi Rajasathan-ah tlain, pilot pahnih an lo thi tawh bawk a ni.

IAF hian fighter squadron 31 neiin, MiG-21 Bison squadron pathum a nei mek a, hengte hi kum 2025-ah chuan thlak vek an ni tawh ang. MiG-21 hi kum 1960 chho aṭangin IAF kutah hlan a ni a, hemi hnu hian supersonic fighter hi 800 chuang nei tawhin, hun rei tak frontline fighter jet-ah an hmang. Mahse fighter jet chetsualna hi ṭum 400 chuang thleng tawhin, pilot 200 velin nunna an chan phah tawh a ni.