Kerala-a tourist boat chesualah mi 22 an thi

Kerala-a Malappuram district-ah Pathianni zan khan tourist boat chesualin a let a, mi 22 an thi. Thi zingah hian naupang pasarih an tel.

Chetsualna thlenna hmun hi Tanur area-a Tuvalthiram beach bulah niin, zan dar 7 vela thleng a ni. Police-te chuan lawng neitu lakah hian thubuai ziahluh nghal a ni tih an sawi.

Kerala sorkar chuan chetsualna thlen dan chhui chiang turin thupek a tichhuak tawh a, thi chhungte hnenah zangnadawmna Rs nuai 10 ṭheuh pek a nih tur thu a puang bawk.

Lawng chetsual lai hian mi eng zat chiah nge chuang hriatchian a ni lo a, ticket nei chu mi 40 awmin, ticket nei lo mi dang eng maw zat an awm. He lawng hian safe certificate pawh a nei lo nia sawi a ni.

National Disaster Response Force (NDRF) leh Indian Coast Guard-te chuan chhanchhuah hna an thawk a, chin hriat loa awmte pawh zawn mek niin underwater camera-te hman a ni. Kerala chief minister Pinarayi Vijayan chuan nimin khan lawng chetsualna hmun hi tlawhin, nimin khan state pumah lawng chesuala thite sunna ni atan a puang bawk.