West Bengal CM-in 'The Kerala Story' tihchhuah a khap; UP CM-in an state-ah chhiah a awltir ve thung

West Bengal chief minister Mamata Banerjee-in inhnialna tam tak siamtu, 'The Kerala Story' film chu an state-ah tihchhuah khap a nih thu a puan hnuah, Uttar Pradesh chief minister Yogi Adityanath chuan he film hi BJP sorkarna UP-ah chhiah awltir a ni dawn tih a sawi ve thung.

'The Kerala Story' hi Kerala-a Hindu hmeichhe ṭhenkhat, an sakhua inlehtir tur leh firfiak pawl Islamic State zawm tura nawr luih an nih dan chungchang tarlanna a ni.

May 5-a tihchhuah, The Kerala Story film hian sawizui a hlawhin, state hrang hrangah inhnialna pawh a chawk chhuak a ni. He film hi Muslim political group bakah eptu party, Congress, Trinamool Congress leh DMK chuan na takin an sawisel a, BJP erawh chuan he film hi thlawpin vawrh lar an tum thung. BJP sorkarna Madhya Pradesh chuan he film hi an state-ah chhiah awltir a ni dawn tih a lo sawi tawh bawk.

West Bengal CM chuan he film-a tarlan ṭhenkhat chu boruak leh inunauna tichhe thei a ni tih sawiin, inhuatna leh tharum thawhna chhuak thei venna atan an state-ah tihchhuah khap a ni tih a sawi a, he film hi state pakhat hming tihchhiatna a ni bawk a ni, a ti. A tichhuak lui video hall-te lakah action lak a ni dawn tih a sawi.

Hetih lai hian prime minister Narendra Modi chuan Karnataka-a rally a neih ṭumin 'The Kashmir Story' hi a fak hle a, firfiak a chetna leh firfiakte thil tum tarlanna dik tak a ni tiin, Congress-in he film a dodalna chhan chu vote zawnna atana firfiak zawnga chetna thlengte an thup vang tiin a puh. Union information and broadcasting minister Anurag Thakur chuan he film dodaltute chu firfiak leh IS pawl thlawptute tiin a lo sawi bawk. India rama Hindu hmeichhiate sakhaw danga an inleh duh lohna lantira aw chhuah turin mipuite a sawm bawk.