SC-a petition thehluhah Kristian-te beihna a hluar thu sawi

Supreme court-a petition thehluhah, kum 2022 hnuah India ramah Kristian-te beihna a hluar tih sawiin, state hrang hrangin sakhaw inlehkhapna, anti-conversion law an siam chhoh mekah sakhaw tlem zawkte beihna thleng thubuai ziahluh pawh a tam chho a ni, an ti.

Petition-ah hian kum 2022 hnua state hrang hrang, Bihar, Haryana, Chhattisgarh, Jharkhand, Odisha, Karnataka, Madhya Pradesh leh Uttar Pradesh-a Kristiante beihna thleng list an tarlang bawk.

Hetih lai hian sorkar laipui chuan petition thehlutte thil sawi chu an sawi uar lutuk niin a sawi thung a, inbeihna thleng tam takah chuan Kristian-te lo tel mah se, an buaina chhan tak erawh an mimal thil vanga ṭhenawm khawveng intihbuainate a ni zawk, a ti.

Mahse petition thehluttute chuan sorkar affidavit-ah hian Kristiante laka complaint thehluttu, police-in FIR an ziahluhsak zawkte chungchang chauh a tarlang tih an sawi ve thung. "Buaina thleng zinga 90% chuang hi, mimal in emaw, biak-inah emaw ṭawngṭaina hun an hmanlai a, sakhaw pawl dang lian zawkin an luhkhung a, an tibuai a, hmeichhiate leh pastor-te thlenga an khawihna te an ni. Inkhawmnaa awmte chu police station-ahte hruai luiin an lakah FIR an thehlut a, pastor-te pawhin jail te an tan phah bawk. Heng thil thleng tam takah hian pawikhawihtu zawk chu tualchhung police-ten an ṭawiawm a, hei vang hian an inringtawk hle a ni," a ti.

Petition-ah hian inbeihna thlengte chu a inzawm vek lem lo a, mahse a hmaa lo ruahman lawkte an ni hlawm tiin, pawikhawitute hi police-ten thubuai an siamsak ngai lo tih an sawi bawk.