Karnataka Legislative Assembly vote an thlak ta

Karnataka legislative assembly inthlan chu nimin khan neih a ni a, zing dar 7 aṭanga vote thlak ṭanin, zan dar 6 thleng vote thlak hun hawn a ni.

Assembly seat 224 awmna, Karnataka-ah hian vote nei vaibelchhe 5.3 an awm a, vote thlakna tur polling station 58,545 siam a ni. Candidate 2,615 an awm. Vote tlate hi May 13-ah chhiarin, result puan a ni ang.

Karnataka-ah hian kum 1985 aṭang khan inthlanah rorellai party thlan tlin an la ni ngai lo a, mahse sorkarna siam mek, BJP chuan thlak danglama, a zawna term hnih sorkar siam ngei turin campaign pawh an bei ngawrh hle. Central lama party hruaitu leh, state hrang hranga BJP chief minister-te pawh an campaign a ni.

Poll official-te chuan boruak ṭha tak hnuaia vote thlak a nih theihnan security lam pawh an ruahman ṭha hle tih an sawi. Vote thlak ni hian dan leh thupek kengkawh turin state chhung hmun hrang hrangah state police 84,119 leh Central Armed Police Forces (CAPF) 58,500 an duty a ni. Polling station zinga ven uluk ngai zual, critical polling station-ah chuan micro observer-te bakah, webcasting leh CCTV-te hman tel a ni bawk.

Karnataka Assembly-ah hian BJP chuan MLA 116 nei mekin, Congress-in 69, JDSO-in 29, BSP-in pakhat leh independent MLA pahnih an awm. MLA zinga party dang zawm vanga disqualify leh, thi an awm avangin seat paruk a ruak mek bawk a ni.

Nimin vek khan Jalandhar, Punba-ah Lok Sabha seat pakhat, Uttar Pradesh-a assembly constituency pahnih,Odisha-ah assembly constituency pakhat leh Meghalaya-a assembly constituency pakhatah by-election neih a ni bawk a, heng inthlana vote tlate hi May 13-ah chhiar an ni ang.