Sorkarin WhatsApp privacy palzut a nih dan chhui dawn

WhatsApp privacy palzutsak nia sawi awm chu sorkar laipui chuan a chhui chiang dawn tih Minister of State for Electronics and Information Technology Rajeev Chandrasekhar chuan a sawi.

WhatsApp hian smartphone neituin a phone a hman loh laiin a microphone a lo khawih/lut thei nia sawi a ni a; Twitter-a engineering director, Foad Dabiri chuan, a muthilh laiin WhatsApp hian a microphone chu a lo hmang reng tih a sawi. He thil hi privacy palzutna a ni tih sawiin, Chandrasekhar chuan an chhui chiang dawn a tih a sawi.

WhatsApp lam pawhin Twitter engineer hi an biak nghal thu leh, he thil hi Android-a bug vang nia an hriat thu sawiin, Google hnenah chhui chiang tura an ngen thu an sawi.

WhatsApp lam chuan a phone hmangtu chuan a phone-a mic setting chungchang chu a control vek a nih thu an tarlang a, "Permission pek chauhin, phone neituin voice note emaw video emaw a record/call laiin WhatsApp hian mic hi a hmang ve thei chauh a ni," an ti.

Hetih lai hian India rama WhatsApp hmangtu tam tak chuan tun hnaiah international spam call a tam thu an sawi a, spam call tam zawk code hi Indonesia (+62), Vietnam (+84), Malaysia (+60), Kenya (+254) leh Ethiopia (+251)-te niin an sawi .