PM Modi-a'n Rajasthan-ah road show nei

Prime minister Narendra Modi chuan nimin khan Nathdwara, Rajasthan-ah road show a nei a, development project Rs vbc 5,500 chuang hu a hawng nghal bawk.

PM Modi hi governor Kalraj Mishra leh chief minister Ashok Gehlot-ten airport-ah an lo hmuak a, Nathdwara a thlen hnuah Shrinathji temple-ah kalin a ṭawngṭai hmasa phawt a ni.

Prime Minister Office-in a tarlan danin, nimina Rajasthan-a project hrang hrang hawnte hi infrastructure leh connectivity lam thuam chakna tur a ni tih a sawi. Relkawng leh kawngpui ṭha leh changtlung zawk siam hian trade leh commerce lam a tihchak phah dawn a, mipuite dinhmun thlengin a chawikan phah dawn a ni, a ti.

Nimina PM-in project a hawn zingah hian Rajsamand leh Udaipur-a kawngpui, two-lane siamṭhatna tur te, Udaipur railway station tihchangtlunna tur te, Nathdwara aṭanga rel kawng thar siamna tur te bakah national highway project pathum a tel.

Modi chuan development project hrang hrang siam a nih avangin Rajasthan mipuite a lawmpui thu a sawi a, Rajasthan chu modern infrastructure pek zel an tum thu leh, hei hi chak zawka hmasawnna kalpuina atana thil ṭul a nih thu a sawi. PM hian kumina Rajasthan state a tlawh ṭum thumna a ni.