Delhi sorkar leh sorkar laipuiin thuneihna an inchuhnaah Supreme Court-in Delhi sorkar kutah thuneihna a pe

Delhi-a Aam Aadmi Party (AAP) sorkar leh central-a BJP kaihhruai sorkarin Delhi khawpuia adminstrative service chungchanga thuneitu nih an inchuhnaah, Supreme Court chuan Dehli sorkar chu land, police leh law and order tih loh, service dang zawng zawngah national capital region-ah thuneitu zawk tur a ni tih a sawi.

Chief justice of India DY Chandrachud, justice - MR Shah, Krishna Murari, Hima Kohli leh PS Narasimha awmna Constitution bench chuan nimin khan thupek hi tichhuakin, democracy sorkarah chuan administration lama thuneihna chu mipuiten an aiawh tura a thlan chhuah sorkar kutah a awm tur a ni, a ti. Mipui thlan sorkar kutah an state officer-te laka thuneihna pek a nih loh chuan, sorkar rintlak a nih theihna a tinep dawn a ni, a ti. State sorkar inrelbawlna chu sorkar laipui chuan a chhuhsak tur a ni lo, a ti. Kum 2019-a Justice Ashok Bhusan-a'n city government-in service chungchanga thuneihna a nei lo tia thutlukna a lo siam chu Supreme Court hian a pawm lo.

Kum 2014-a AAP-in Delhi-a sorkarna an siam aṭangin, India ram khawpuia inrelbawlna kawnga thuneihna kawngah Delhi sorkar leh BJP kaihhruai sorkar laipui hi an inbei zui reng a ni. Supreme Court-a judge pathum awmna bench ngaihtuah tura dah a ni a, mahse sorkar laipuiin bench lian zawk ngaihtuah tura dah tura a ngen angin, kum 2021 May thla khan Constitution Bench ngaihtuah tur hian dah a ni.

Delhi-a rorellai, AAP chuan Supreme Court thutlukna siam chu lawmawm an tih thu sawiin, Delhi mipuite tana hnehna a ni, an ti.

AAP MP Atishi chuan court thutlukna tihchhuah a nih tak avangin, Delhi sorkarin hmasawnna hna a thawh chu tibuaitu awm loin, chak takin kalpui a ni thei tawh dawn a ni tiin, court thutlukna chu thil chhinchhiah tlak a nih thu a sawi.