US palai tharin President hnenah credentials hlan

India rama US ambassador thar, Eric Garcetti chuan nimin khan president Droupadi Murmu hnenah, ram palai atana ruat a nih nemnghehna, credentials a hlan.

Rahstrapati Bhavan-a hun hmanah hian Garcetti bakah Qatar leh Monaco palaite pawhin President hnenah hian credentials hi an hlan ve bawk.

US hian kum hnih chhung India ramah ambassoder nghet a neih loh hnuin, Eric Garcetti hi a rawn ruat thar a ni. Garcetti chuan President Murmu hnena credentials a hlan thei chu a lawm thu sawiin, US nena thawdunna ṭha tak an neih avangin India sorkar chu lawmthu a hrilh a, thawhdunna ṭha leh nghet zawk siam tura India mipuite nena thawhho chu a phur tawh hle tih a sawi bawk.

Ambassador Garcetti hian kar leh hian official trip hmasa ber neiin Ahmedabad leh Mumbai-te a tlawh ang.

Garcetti hi kum 12 chhung Los Angeles city council member niin, kum 2013 khan Mayor atan thlan a ni a, mayor ni thei naupang ber a ni bawk. Kum 2017-ah hneh taka thlan tlin nawn leh niin, reserve component-ah kum 12 chhung naval officer hna a lo thawk tawh bawk a ni.