RPF-in dan loa ticket zuar ṭhin dap

Railway Police Force (RPF) chuan dan loa rel ticket lo zuar ṭhinte man chhuah tumin beihpui an thlak a, ticket lo zuar chhawng ṭhin leh illegal software eng emaw zat an man.

RFP-te hian rel station, reservation counter leh online content-te chu a khat tawkin an endik ṭhin a, phalna nei loa ticket booking agent awmte an man a ni. Ticket zuartu, siamtu, super seller leh retailer 955 bakah, illegal software 42 an man tawh tih an sawi.

Indian Railway Catering and Tourism Corporation (IRCTC) chuan dik lo taka thiltih awm ṭhin venna tur hian ruahmanna te pawh a lo siam tawh a ni. IRCTC user ID hi mobile number leh emaid ID-ah pakhat chauh a siam theih a, mi pakhat hian thla khatah rel ticket hi paruk chin bak a book phalsak a ni lo bawk. Mahse ticket a book theih chin hi an ID leh Aadhaar number an thlunzawm a, an book sak zinga pakhat tal chu Aadhaar number hmanga finfiah a nih theih chuan thla khatah rel ticket 12 a book phalsak a ni thung. IRCTC hian user ID hi nitin a enfiah ṭhin a, dik tawk loa ti ṭhin ID chu a tihtawp sak bakah, an ticket book pawh a cancel sak ṭhin.