June thlaah PM Modi-a'n US tlawh dawn

Sorkar laipui thuchhuah chuan, US president Joe Biden leh first lady Jill Biden-te sawmna angin, prime minister Narendra Modi chu June 22 hian US-ah a zin dawn tih a sawi. US President leh First Lady hian Modi hi state dinner an lo buatsaih sak dawn bawk a ni.

Prime Minister Modi hian kum 2021 khan US tlawhin, White House-ah Joe Biden nen pawh an lo inhmu tawh a ni. Mahse state visit ang ni loin, Quad summit peng pakhata zin a ni thung.

US leh India hian thawhdunna nghet leh zau zawk siam turin hma an la mek a, thla hmasa khan defence leh technology lama thawhdunna turin hma an la dawn tih an lo puang tawh a, an hmalakna turah hian General Electric jet engine siam dun pawh a tel.

Sorkar thuchhuah chuan June thlaa ram pahnih hruaitute inhmuhnaah hian, pluri-lateral leh multilateral fora lamah, G20 huamin thawhdunna chak zawk siam dan tur an ngaihtuah dawn tih a tarlang.

White House pawhin thuchhuah siamin, PM Modi-a'n an ram a tlawh tur chuan US leh India inkara inlaichinna nghet leh ṭha a awmzia, America leh India mipuite inkar inzawmna ṭha tak a awmzia a nemnghet dawn a ni, a ti.