AAP-in Supreme Court thupek zawm loah sorkar laipui puh

Aam Aadmi Party (AAP) chuan Supreme Court-a Consitution bench-in Delhi-a admistrative service chungchanga thuneihna Delhi-a AAP sorkar kuta a pek hnuah, sorkar laipui chuan Court thupek hi a zawm duh lo tih a sawi.

Delhi sorkar leh central-a BJP sorkarin Delhi administrative service chungchanga thuneitu zawk nih an inchuhnaah, chief justice of India DY Chandrachud kaihhruai Constitution bench chuan, service chungchanga thuneihna hi Delhi mipuite aiawh tura an thlanchhuah sorkar kutah a awm tur a ni, tiin Nilaini khan thupek a lo tichhuak tawh a ni.

Supreme Court thutlukna tihchhuah a nih hnuah, Delhi sorkar chuan services secretary Ashish More transfer-na tur a tichhuak ve nghal a, mahse hei hi sorkar laipui chuan a lo dansak leh niin AAP chuan an sawi.

Chief minister Arvind Kejriwal chuan administrative service lam an siksawi nasa dawn tih a sawi a, sorkarin mipuite hmasawnna tura a hna thawh lo daltu officer-te chungah action lak a ni, a ti. Kejirwal chuan kum khat leh a chanve liam ta chhung khan officer ṭhenkhat chuan Delhi sorkar hnathawh tur hi an dan sak ṭhin a, mohalla clinic leh hospital-a damdawi supply turte dangin, hmun ṭhenkhata tui supply pawh an lo tihtawpsak tih a sawi a, hetianga mipuite tana hna thawh tur lo dangtute hian an thiltih man hi an pe ngei dawn a ni, a ti.

Supreme Court thupek chuan officer taima leh rinawmte chu Delhi mipuite tana hna thawh leh rawngbawlsak theihna hun a rawn siamsak ta a ni, tiin Kejriwal chuan a sawi.

Court thupek tihchhuah a nih hnua services secretary transfer-na sorkar laipuiin a kalpui duh loh chungchang hi nimin khan AAP chuan Supreme Court-ah hian an thlen a, CJI Chandrachud chuan kar lehah hemi chungchang ngaihtuahtu tur bench siam a ni dawn tih a lo hrilh.