SC-in Gujarat-a judicial officer 68 kaisantirna a dan sak

Supreme Court chuan nimin khan Gujarat-a judicial officer 68-te kaisan tirna, promotion chu a dansak. State sorkarin judicial officer a kaisantir zingah hian Congress president hlui, Rahul Gandhi-a a defamation case-a thiam loh chantir a, kum hnih tang tura hremna petu Surat chief judicial magistrate Harish Hasmukhbhai Varma pawh a tel.

Jutice MR Shah kaihhruai Supreme Court bench chuan, judicial office-te kaisantir an nih danah “merit-cum-seniority principle” bawhchhiat a nih thu sawiin, a 'stay' sak. Gujarat Stat Judicial Service Rules 2005, kum 2011-a siamṭhat an tarlan angin, promotion chu merit-cum-seniority hmanga kalpui tur a ni, a ti.

Judicial officer-te promotion pek an nih danah hian thil dik tawk lo a awm tih sawiin, civil judge cadre officer pahnih, Ravikmar Maheta leh Sachin Pratapari Mehta-te chuan Supreme Court-ah petition an thehlut a ni. Bench chuan promotion pek, judicial officer-te chu a hmaa an post ngaiah awm leh vek turin a ti nghal bawk. May 15-ah hemi chungchang hi ngaihtuah chhunzawm a ni ang.

Bench chuan April 13-a judicial officer pahnihin petition an thehluh chungchangah, state sorkar leh Gujarat High Court-a Registrar General chu promotion kalpui danah hriattirna a pe leh, April 28 thleng insawifiahna hun a pe chunga state sorkarin officer 68-te kaisantirna tur thupek, April 18-a a chhuah lui chu a sawisel bawk.