Covid-19 hri vei mek zat tlahniam zel

Ram chhunga Covid-19 hri rawn leng thar leh chu a ziaawm leh tawh hle a, hri vei mek zat pawh an tlahniam zel.

Union health ministry-in nimina data a tihchhuahah hri vei mek, active case hi 18,009-ah a tlahniam tawh tih a tarlang. Active case hi hri kai tawh aṭangin 0.04% an ni.

Ningani khan ram pumah hri kai hmuh chhuah thar hi 1,580 an awm a, thihpui 17 an awm bawk. Hri kai enkawl dam 3,167 an awm bawk a ni. Hemi ni bik hian sample 1,28,764 test niin, daily positivity rate hi 1.23% a ni a, weekly positivity rate 1.49% a ni bawk. Covid sample test tawh zawng zawng hi vbc 92.83 a tling tawh a ni.

Ram pumah Covid-19 hri kai hmuh chhuah tawh hi nimin zing dar 8 thleng khan mi 4,49,76,599 an awm tawh a, thihpui hi 5,31,753 an awm tawh bawk. Hri kai zinga 1.18% in an thihpui. Hetih lai hian hri kai enkawl dam tawh hi 4,44,28,417 awmin, hei hi 98.77% a tling.

Nimin zing thleng khan ram pumah Covid vaccine dose vaibechhe 220.66 pek chhuah a ni tawh a, heng zingah hian second dose vbc 95.21 leh booster dose, precautionany dose tih bawk dose vbc 22.87 a tel a ni. Ningani khan vaccine hi dose 1,593 pek chhuah a ni.