Karnataka-ah Congress-in party malin sorkarna siam thei BJP-in chhim lama a sorkarna state awmchhun a hum zo lo

Karnataka assembly inthlan neih zawh takah Congress party chuan rorellai BJP hnehin, seat 224 awmna Assembly-ah seat 135 a la a, party malin sorkarna a siam thei dawn. Congress party hian vote tla aṭangin 42.9% a hmu pha.

Assembly inthlan hi May 10 khan neih a ni a, Inrinni liam ta khan vote tlate chhiarin result puan a ni. BJP chuan India chhim lam state-a a sorkarna awmchhun a hum zo lo a, Congress party lakah a tlawm ta a ni.

Congress party hian 2018 assembly inthlan aiin seat 55-in a la tam zawk a, kum 30 chhunga Karnataka inthlana seat a lak hnem ber leh vote a hmu tam ber ṭum a ni. Hemi hmaa a seat lak hnem ber chu kum 1999 inthlan kha niin, hemi ṭum hian seat 132 a la a, vote tla aṭangin 40.84% a hmu bawk.

Rorellai BJP chuan seat 66 lain, vote tla aṭangin 36% a hmu. HD Kumaraswamy kaihhruai Janata Dal-Secular (JDS) chuan seat 19 lain, vote 13.29% an hmu pha a ni.

Congress party chuan inthlanah hian an chak ngei a inbeisei rualin, an beisei aia tam zawk seat an la tih an sawi. Party president Mallikarjun Kharge chuan, "He hnehna hi state mipuite tan a ni. Anni hian thutlukna siamin an aiawhtu tur an thlang a ni. Manifesto-a welfare scheme kan tarlan zawng zawngte an tihlawhtling ang," a ti.

Karnataka-a hlawhtlinna an channa chhan pakhat chu Rahul Gandhi-a 'Bharat Jodo Yatra' neih vang a ni tih Congress chuan an sawi. Kharge chuan Rahul Gandhi-a'n Yatra an neihnaa Karnataka-a a kalna/paltlangna bialah chuan seat 99% dawnah hnehna an chang tih a sawi.

Hetihlai hian hnehna an chan hnuah, Congress member zingah chief minister tur chungchangah inhruihpawhna a awm nia sawi a ni. State Congress president DK Shivakumar leh Assembly-a Leader of Opposition nilai, chief minister hlui ni bawk Siddaramaiah thlawptute chuan nimin khan Chief Minister atana dah tura duhna thu poster-te an tar zui a ni. Congress chuan nizan khan MLA thlan tharte chu meeting a ko nghal a, chief minister tur hi an puang nghal dawn em tih erawh sawilang lo mah se, meeting-ah hian an thlanfel nghal rin a ni.

India ram chhim lam state zingah Karnataka hi BJP sorkarna awmchhun a ni a, mahse inthlanah Congress party chak a, sorkar thar an siam dawn tak avangin chhim lam state-ah BJP sorkarna a awm dawn ta lo a ni. BJP hian ram pum huapin, state leh UT 15-ah sorkarna a chelh mek a, mahse heng zinga state pasarih chauh hi state lian, mi vaibelchhe 1 chuang chenna a ni. 2011 Census aṭanga chhutin, BJP sorkarna hian ram mipui 45% chin chauh a huam tawh a ni.