The Kerala Story khap vangin SC-in Bengal sorkar hriattirna pe

Supreme Court chuan West Bengal sorkarin an state chhunga The Kerala Story film tihchhuah a khap chungchangah hriattirna a pe a, ram chhung hmun dangah harsatna awm loa tihchhuah a nih theih laia a khap bikna chhan a zawt.

Chief justice of India DY Chandrachud leh justice PS Narasimha awmna bench chuan Bengal sorkarin film tihchhuah a khap chungchanga film siamtuten petition an thehluh chu ngaihtuahin, Bengal sorkar aiawhtu Abhisshek Manu Singhvi hnenah, May 5-ah ram chhung hmun dangah he film hi tlangzarhin an tichhuak vel a, engvangin nge West Bengal chuan a khap bik tih an zawt. Singhvi chuan West Bengal Cinemas Act, 1954 hnuaiah state sorkar chuan boruak ṭha lo chawk thei tura ngaih film chu tihchhuah khap theihna thuneihna a nei a ni, tiin he thil vang hian he film pawh hi khap a nih thu a sawi.

The Kerala Story-ah hian Kerala-a hmeichhe ṭhenkhat Islam sakhuaa inlet tura tihluih an nih dan leh, ISIS firfiak pawla lakluh an nih thu tarlan a ni. Mahse West Bengal chief minister Mamata Banerjee chuan he film hi Kerala state leh a mipuite tihhmingchhiat tumna a ni tiin, BJP chuan sakhaw hmanga inhuatna politics kalpui leh thehdarhah a puh bawk. Hei vang hian an state-a tihchhuah hi a khap a ni.