BJP-in PM Modi kaihhruai sorkar kum 9 tlin lawm nan thla khat awh special contact campaign buatsaih dawn

Prime minister Narendra Modi kaihhruai sorkar laipuiin kum kua a tlin lawmna pualin, Bharatiya Janata Party (BJP) chuan May 30 aṭangin ram pumah thla khat awh special contact compaign a buatsaih dawn.

He special campaign hi May 30-ah PM Modi-a'n a hawng dawn a, June 20 thleng awhin, ram chhunga Lok Sabha constituency zawng zawngah kalpui tum a ni. May 31 hian Prime Minister hian rally a nei dawn bawk a, campaign neih chhung hian BJP senior leader-te chuan hmun 51-ah rally an nei bawk ang.

Lok Sabha seat 396-ah public meeting buatsaih a ni dawn bawk a, he hunah hian union minister emaw, party national official emawin an telpui zel dawn a ni. Assembly inthlan hmasak, Madhya Pradesh, Rajasthan, Chhattisgarh leh Telangana-ahte rally hi ṭum eng emaw zat buatsaih tum a ni bawk.

Campaign neih chhung hian mipui hnenah a tam thei angin PM Modi kaihhruai sorkar laipui policy hrang hrang leh hlawhtlinna a neihte puanzar a ni ang. Rally leh public meeting-ahte hian BJP chiet minister, MP leh MLA-te sawm vek an ni ang.

Party thuchhuah chuan thla khat awh campaign neih chhung hian chhhungkaw nuai 1; Lok Sabha constituency tinah chhungkaw 250 ṭheuh chu biakpawh tum a ni, an ti.