Bihar CM-in Patna-ah Opposition leaders' meet buatsaih tum

Bihar chief minister Nitish Kumar chuan kum 2024 Lok Sabha inthlanpui neih turah eptu ṭangrual pawl din tuma hma lakna kal zelah, Bihar khawpui Patna-ah Opposition leaders meeting koh a tum.

Eptu hruaituten meeting neih hun tur hi la sawichiang lo mah se, kar leh lamah an nei hrin a ni. Meeting an neihna tur Gandhi Maidan hi revolutionary leader Jayapraksh Narayan-a'n kum 1974, June 5-a a slogan lar tak, ‘Sampoorn Kranti’ (Total Revolution) a lo auchhuah pui ṭanna kha a ni.

Nitish Kumar hian West Bengal chief minister leh Trinamool Congress hruaitu, Mamata Banerjee chu Kolkata-ah a lo hmu tawh a, ani hian Patna-ah Opposition leaders' meeting buatsaih tur hian thurawn a lo pe a ni. Mamata Banerjee chuan Bihar-a inhmuhkhawmna neihah hian an hma lak zel dan tur pawh an rel thei dawn niin a sawi.

Kumar hian eptu ṭangrual siam dan sawipui hian Banerjee bakah NCP hotu Sharad Pawar, Shiv Sena leader Uddhav Thackeray, Odisha chief minister Naveen Patnaik, Samajwadi Party hotu leh Uttar Pradesh chief hlui Akhilesh Yadav leh Jharkhand chief minister Hemant Soren-te pawh a lo hmu tawh bawk. April thla khan Delhi-ah Congress president Mallikarjun Kharge bakah Rahul Gandhi, Delhi chief minister Arvind Kejriwal, CPI (M) general secretary Sitaram Yechury leh CPI general secretary D Raja-te a lo kawm tawh bawk a ni.