Shah Rukh Khan laka Rs vbc 25 phûttu NCB zonal director hlui lakah CBI-in thubuai ziaklut

Central Bureau of Investigation (CBI) chuan kum 2021, October thlaaa cruise ship-a ruihhlo an man ṭum khan, hetihlaia Narcotics Control Bureau (NCB) regional director Sameer Wankhede chuan lemchanthiam, Shah Rukh Khan hnenah Rs vbc 25 pe turin a phut avangin a lakah FIR an thehlut.

Ruihhlo an manna cruise ship-ah hian Shah Rukh Khan-a fapa, Aryan Khan a chuang ve a, Sameer Wankhede chuan Shah Rukh Khan hnenah hian Rs vbc 25 a pek loh chuan a fapa hi narcotics case siamsak a ni ve dawn tiin a vau a ni. Wankhede hi eirukna leh dan kalha thiltia puhna thubuai siamsak a ni.

CBI-in FIR a ziahluhah hian Wankhede bakah mi dang pali hming tarlan a ni bawk. An zinga pahnih, Vishwa Vijay Singh leh Ashish Ranja-te hi NCB mi leh sa niin, anni bakah KP Gosavi leh Wankhede thawhpui hnaivai tak Sanvile D'Souza-te hming chu ziahlan an ni.

KP Gosavi hi lawnga ruihhlo hmuh avanga Aryan Khan man a nih hnua lo selfie puitu a ni a, NCB-a thawk ni silo a lo inrawlh ve chungchang khan sawizui pawh a hlawh hman hle. CBI pawhin Gosavi chet dan chu dan phal loh a nih thu FIR-ah pawh hian an tarlang.

FIR-ah hian Aryan Khan thubuai siamsak a nih ve lohna atan Shak Rukh Khan chhungkua chu Rs vbc 25 pe tura vau an nih hnuah, Rs vbc 18-in an in be rem a, KP Gosavi leh Sanville D'Souza-te hian thamna Rs nuai 50 an lo la bawk a, mahse heng zinga ṭhenkhat chu a hnuah an pe kir leh niin an sawi.

Aryan Khan hi ni 22 chhung jail-a hren a nih hnuah, NCB chuan ruihhlo kawl nia puhnaah finfiahna rintlak a awm lo tiin a chhuah a. Mahse he thil thlen hnuah Wakhede leh a team-ten thamna an phut chungchang hi a hrana chhui zui a ni ve leh ta thung a ni.