Darkar 24 chhungin Hripui vangin mi 904 an thi
Hripui lengin ziaawm lam a pan thei lo a, Ministry of Health and Family Welfare-in nimina report an tihchhuahah darkar 24 chhungin Covid-19 vanga thi mi 904 lai an awm leh a, hri vanga thi hi sing li chuang tawhin mi 40,699-in an thihpui tawh a ni.
India ram hmun hrang hrangah hripui kai hmuh chhuah thar mi 56,282 an awm a, hei nen hian hri len ṭantirh aṭanga nimin thleng khan hri kai mi 19,64,536 an awm tawh. Mi 46,121 chu dama puan an ni leh a, hri kai dam leh tawh pawh 13,28,336 lai an awm tawh a, hri kai mek 5,95,501 an awm tawh a ni. Enkawl dam rate hi 67.61% niin thihpui rate hi 2.07% a ni thung.
Ni khata sample enfiah tam ber ni
Indian Council of Medical Research (ICMR) chuan dakar 24 chhungin Covid-19 sample 6,64,949 an enfiah a, hei hi ni khata an enfiah tam ber ni a ni leh. Hri len ṭantirh aṭanga nimin thleng khan sample 2,21,49,351 lai an test tawh. ICMR hian sample enfiahna tura pawmpui laboratory hi ramchhung hmun hrang hrangah 1,370 a nei tawh a, heng zinga 921 hi sorkar laboratory a nih laiin 449 chu private laboratory a ni thung.