J&K Lieutenant Governor a bâng A thlaktu atan Majon Sinha ruat nghal

Jammu and Kashmir Lieutenant Governor Girish Chandra Murmu chu Nilaini zan khan a bang a, nimin khan a thlaktu tur atan BJP senior leader leh union minister hlui Manoj Sinha chu ruat nghal a ni. 

Girish Chandra Murmu-a'n banna a thehluh thutna chhan hi hriatchian ni lo mah se, Comptroller and Auditor General (CAG) thar atana dah tum a nih vang nia sawi a ni. CAG  nilai Rajiv Mehrisi chu tunkar hian a pension tawh dawn a,  a post hi constitutional post a nih avangin dah ruah theih a ni dawn lo a ni. Hei vang hian a thlaktu tura rin kai, Murmu hian a  hna hi alo bansan lawk nia ngaih a ni. 

Murmu hi 1985-batch Gujarat cadre offier a ni a, Gujarat chief minister-a Narendrda Modi a awm lai khan a lo thawpui tawh a ni. Modi a PM hnuah pawh, Murmu hi union finance ministry-ah dah ve leh nghal a ni a, expenditure department-ah joint secretary atan dah a ni. Nikum November thla khan a chawl tawh dawn nia rin a ni a, mahse J&K state ṭhiah a nih a, Union Territory-a ṭhen a nih takah khan J&K Lieutenant Governor hmasa ber atan dah a ni. 

President Ram Nath Kovind chuan Girish Chandra Murmu banna a pawmsak thu leh, J&K Lieutenant Governor thar atan Manoj Sinha ruat a nih thu nimin khan a chhuah nghal. Kum 61 mi Manoj Sinha hi Indian Institute of Technology (BHU) Varanasi aṭangin B.Tech leh M.Tech a zirchhuak a, Banaras Hindu University-a student union president a nih aṭangin politics lamah a inhmang chho ṭan a ni. 

Kum 2014-2019 inkar khan Minister of State (Lok Sabha MP) hna a chelh ṭhin bawk. J&K-a LT atan Sinha ruat a nih chhan hi J&K-a politics siamṭhat a nih theih nan a ni tiin media-te chuan an tarlang.