Haryana-a sanitizer brand 11-te lakah thubuai siamsak

Haryana health minister Anil Vij chuan Nilaini khan sanitizer brand 11-te lakah, an sanitizer siam chu a ṭha tawk lo a, quality parameter a paltlang zawh loh avangin  thubuai a siamsak. 

Thubuai siamsak, sanitizer siamtu brand-te hnenah hian an licence suspend sakna tur  hriattirna pawh pek an ni nghal bawk. Minister chuan Food and Drug Administration in district hrang hranga sanitizer sample 248 a lakhawm a, heng sanitizer siamte hi a ṭha em, a hman tlak em, tih test vek a ni tih a sawi. Sample an lakkhawm zinga 123 test report chu an dawng tawh a, sample 109 in test hi an paltlang a, a dang 14 sample chuan test an paltlang zo lo tih minister chuan a sawi. 

Test paltlang zo lo, sanitizer 14 zinga 9-te chu a ṭha tawk lo a, a dang panga-ah chuan methanol an telh tam lutuk tih hmuh chhuah a nih thu leh, hei hi a hlauhawm thu a sawi a ni. Vij chuan Covid-19 hri leng vangin sanitizer lem siam tam tak ramchhunga an awm thu a sawi a, tam tak chu a him tawk lo a, mihringte tana hlauhawm a nih thu a sawi bawk. Hei vang hian Food and Drug Administration hnenah an state chhunga mite chu endik vek turin an hrilh tih a sawi a ni.