Karnataka Chief Minister thar tur la puang thei lo

Karnataka assembly inthlan neih zawh takah Congress party chu party mala sorkarna siam thei turin an chak a, mahse inthlan result puan a nih aṭanga ni li na, nimin thleng khan chief minister tur ruat fel a la ni lo.

Karnataka Congress president DK Shivakumar leh chief minister hlui Siddaraiamah-te chuan Chief Minister dinhmun hi an inchuh mek a, Delhi-a party hotu lutte dawrin an cham mek a ni.

Party MLA thlan thar zinga a tam zawkin Siddaramaiah chu an thlawp zawk avangin CM atan hian dah a ni dawn nia sawi a ni a, mahse nimin tlai thleng khan thutlukna erawh siam a la ni lo. AICC general secretary in charge Karnataka, Randeep Singh Surjewala chuan thutlukna siamnan hian ni hnih vel hun an la duh maithei tih a sawi. CM tur chungchangah thuthang dik lo tam tak a awm a, thuthangte chu awih lo tur leh thehdarh lo tura ngenin, Surjeewala chuan thutlukna an siam veleh puanzar a ni dawn tih a sawi.

Siddaraiamah leh Shivakumar-te hian Delhi-a an party hotute chu a hran ve vein an hmu a ni. Siddaraiamah hi mipui tam zawkin an duh leh, kum 2018-a an sorkar ṭum pawha term hmang zo thei a ni a, hetih lai hian Shivakumar hi pawl enkawlna kawnga mi chak tak, tun ṭum inthlana an party hnehna chan theihna kawngah pawh thawhhlawk tak an ni.

Congress party-in CM thar tur chungchanga thutlukna an siam mai theih loh chu Karnataka CM kalchhuak tur, BJP hruaitu Basavaraj Bommai chuan Congress beihna remchangah hmangin, an party chhung boruak ṭhat lohzia tilangtu a ni, a ti. "Majority an nei chungin CM tur an la thlang fel thei lo. Politics ringawt buaipui lo a, mipuite an ngaihtuah a ngai a, CM hi a rang thei ang bera an thlan fel a hun tawh a ni," a ti.