Union Cabinet-in IT hardware tan Rs vbc 17,000 PLI scheme pawm

Prime minister Narendra Modi kaihhruaia union cabinet meeting chuan, IT Hardware tan Pruduction Linked Incentive Scheme 2.0 pawmin, he scheme atan hian Rs vbc 17,000 a ruahman.

Kum riat kalta chhungin ram chhungin electronics manufacturing sector hian hma a sawn chak hle a, kuminah an thil siamchhuah hi Rs vbc nuai 9 vel tling chhoin, compound annual growth rate (CAGR) hi 17% a ni.

IT and telecom minister Ashwini Vaishnaw chuan, IT PLI scheme atana budget dah chu kum ruk chhung atan a ni tih sawiin, he scheme hian laptop, tablet, all-in-one PC, server, leh ultra-small factor device-te a huam ang.

Union minister chuan PLI scheme 2.0 hmang hian electronics manufacturing sector-te investment thar tam tak hip luh a ni thei dawn tih a sawi a, ṭhalaite tan hna 75,000 vel a siam thei dawn a, ram pawna bungrua thawnchhuah pawh pung chhoin, ram dang aṭanga bungraw lakluha innghahna tam tak pawh a tihziaawm phah dawn a ni, a ti.

PLI scheme hi kum 2020,April thla khan mobile phone siamchhuah lam bik thlurbingna atan kalpui ṭan a ni a, he scheme hmanga hmalakna hnuaiah India chu khawvela mobile phone siamchhuaktu lian pahnihna niin, phone thawnchhuah pawh Rs vbc 90,000 vel a rawn kai chho thei a ni. Mobile phone lamah a hlawhtlin chhoh tak avangin kum 2020, April thla khan IT Hardware tan PLI scheme hi siam a ni leh a, budget-ah Rs vbc 7,350 dah a ni.