Sakhaw zalenna tlahniam zel nia US report MEA-in a hnawl

US State department-in International Religious Freedom report a tihchhuah thar berah India ram chungchang tarlangin, sakhaw zalenna dinhmun a tlahniam zel niin a sawi. Mahse ministry of external affairs (MEA) chuan US State report hi a pawm lo tih sawiin, official ṭhenkhatte thu dik tawk lo sawi behchhanin an siam a ni, a ti.

US hian Thawhṭanni khan report hi a tichhuak a, India rama sakhaw tlem zawk - Kristian, Muslim leh Dalit hnamte beihna thleng ṭhin chungchangte tarlangin, sakhaw inleh khapna dan siamte pawh a sawisel bawk. Rorellai, BJP member ṭhenkhatten inhuatna lam hawi thu an sawi leh buaina a chhuah phah ṭhin chungchangte pawh a tarlang tel. A hminghmerhin mi ṭhenkhat a tarlang tel bawk. "BJP state politician Haribhushan Thakur Bachaul chuan Muslim-te chu hal mai tur a ni a ti a;Kerala legislator hlui PC George chuan Hindu leh Kristian-te chu Muslim-te restaurant siamah chawl lo turin a fuih a, BJP Rajasthan MLA hlui Gyan Dev Ahuja chuan bawng talh nia rinhlelh Muslim-te chu that zel turin Hindu-te a fuih bawk," tiin an tarlang.