Karnataka CM atan Siddaramaiah, Deputy CM-ah Shivakumar

Congress party chuan Karnataka sorkar thar ding tura chief minister tur a thlang fel thei ta. Chief minister atan hian party hruaitu hlun leh CM hlui, Siddaramaiah ruat a ni a, state Congress president DK Shivakumar chu deputy chief minister a ni ang.

Karnataka Assembly inthlanah Congress party hian rorellai BJP chu paihthlain, hneh taka thlan tlin a ni. Mahse party hruaitu pahnihten CM dinhmun an inchuh zui avangin, inthlan result puan hnuah pawh hun rei tak CM tur hi thlang fel thei loin an awm a, nimin khan an puang thei ta chauh a ni. CM leh deputy CM hian an term chanve, kum hnih leh a chanve hnuah an dinhmun hi an inthlak dawn nia sawi a ni.

Party thupuangtu, Randeep Singh Surjewala chuan nimin khan news conference-ah CM thar tur hi a puang a ni. Siddaramaiah leh Shivakumar chuan an state tan theihtawp chhuaha an thawh tur thu sawiin, Siddaramaiah chuan, "Kannadigas te tan lungrual takin kan thawk zel dawn a, Congress party chuan chhungkua angin hna a thawk dawn a ni," a ti. Shivakumar pawhin, "Karnataka leh mipuite ṭhatna tur chu kan ngaih pawimawh ber a ni a, lungrual takin kan thawk zel dawn tih kan tiam a ni," tiin an inkar boruak pawh a ṭha tih an rawn tarlang zui ve bawk.

Chief Minister post inchuh chungchang hi hun rei tak an buai hnuah, party president hlui Sonia Gandhi a inrawlh hnuah an tifel thei ta nia sawi a ni. Shivakumar hian state party president a nih chhunzawm theih dawn avangin deputy CM-a awm hi a pawm thei ta a ni.

Nimin zing khan Siddaramaiah leh Shivakumar-te hian Cognress general secretary KC Venugopal an hmu a, hei hi assembly inthlan result puan hnu leh, CM post an inchuh hnua an inhmuhdun lehna hmasa ber a ni. Party president Mallikarjun Kharge pawh an hmu dun leh bawk.

May 20-ah CM leh Dy CM lalut dawn

Chief Minister leh Deputy Chief Minister thar lakluh inkhawm hi May 20-ah Bengaluru-ah neih a ni ang. Hruaitu thar lakluh inkhawm Congress preisdent Mallikarjun Kharge, Rahul Gandhi, Sonia Gandhi, Priyanka Gandhi Vadra bakah senior leader dangten an telpui dawn a ni. He hunah hian eptu party hruaitute pawh sawm an ni ang.

Kum 2018-a Karnataka chief minister atana JD(S) hruaitu HD Kumaraswamy lakluh a nih ṭum khan eptu pawl hruaitu eng emaw zatin an telpui a, an zingah hian Congress hruaitu Sonia Gandhi leh Rahul Gandhi, Trinamool Congress hruaitu Mamata Banerjee, Telugu Desam Party hotu Chandrababu Naidu, Aam Aadmi Party hruaitu Arvind Kejriwal, Nationalist Congress Party hotu Shad Pawa, JD(U) hruaitu Sharad Yadav, RJD hotu Tejashwi Yadav leh Left Party hotu Sitaram Yechury leh R Raja-te an tel. Tun ṭum CM thar lakluhnaah pawh hian eptu party hruaitu eng emaw zatin an telpui leh rin a ni.

Kum 75 mi, CM thar tur Siddaramaiah hian Janata Parivar aṭangin politics a luhchilh ṭan a, HD Deve Gowda kaihhruai Janata Dal (Secular) aṭanga hnawhchhuah a nih hnuah, kum 2006 khan Congress party a zawm a ni. Kum 2013-2018 khan Congress sorkarah chief minister a lo ni tawh a, CM ni tawh zingah a term hmang zo thei pahnihna a ni.

Deputy CM tur, Shivakumar hi kum 61 mi niin, Karnataka Pradesh Congress Committee president nilai a ni. Kum 27 mi lek a nih laiin Congress ticket-in MLA atan thlan tlin a lo ni tawh. HD Kumaraswamy kaihhruai sorkarah irrigation minister a ni tawh a, Siddaramaiah kaihhruai sorkarah energy minister a ni tawh bawk.