Law Minister aṭangin Earth Sciences minister-ah Rijiju sawn

Kiren Rijiju chu union law minister aṭangin ministry pawimawh lo zawk nia ngaih, earth sciences minister ah dah a ni.

President Droupadi Murmu chuan prime minister Narendra Modi thurawn angin, Kiren Rijiju chu law ministry aṭangin earth sciences ministry chang tura dah a ni tih a sawi. Law ministry enkawl tur hian Arjun Ram Meghwal dah a ni.

Rijiju hi sorkar laipuiah pawh minister langsar zinga mi niin, inhnialna chawk chhuak thei thil pawh a sawichhuak fo a ni. Mahse cabinet status-a hlankai a, law ministry chantir a nih aṭanga kum khat pawh tling loah dah chhuah leh a ni. Judiciary system pawh sawiselin, judge ruat dan collegium system-te chu ram danpui nena kal hrang tiin, khawvelah judge-ten an mi hmelhriatte an ruah theihna system awmchhun a ni, ti tein a sawi a ni. March thla khan judge chawl tawh ṭhenkhat chu anti-India gang tiin, judiciary chu sorkar dodal tura siam tumah te a puh bawk.