Summit hmang turin PM Modi zin chhuak

Prime minister Narendra Modi chu ram pathum - Japan, Papua New Guinea leh Australia-a summit pawimawh hmang turin nimin khan a zinchhuak.

Prime Minister hian a hmasa berah Japan tlawhin, May 10-21-a Hiroshima khawpuia G7 annual summit-ah a tel dawn a, he hunah hian food, fertiliser leh energy security lama khawvelin harsatna leh chona a hmachhawn mek chungchangte a sawi ang.

Japan aṭangin Papua New Guinea-a Port Moresby a pan ang a, May 22-ah Papua New Guinea prime minister James Marape nen Forum for India–Pacific Islands Cooperation (FIPIC) summit vawi thumna an kaihruai dawn a ni.

May 22 ni vek hian a thawh thumna leh tawpna ber atan PM Modi hian Australia lam a pan leh ang a, May 24 thleng a cham ang. A cham chhung hian Sydney-ah Australian CEO leh sumdawng hruaitute a kawm dawn a, India mi awmte nen pawh hun an hmangho bawk ang.

Sydney, Australia-ah hian May 24-a Quad meeting neih tur chu US President a kal theih dawn loh avangin Australia chuan a cancel a, mahse meeting ṭhulh a ni chungin Modi hi a zin dawn ta tho a ni. Australia prime minister Antony Albanese chuan PM Modi hian meeting neiin, ram pahnihte inlaichinna chungchangte an sawidun dawn tih a sawi.

PM Modi hian US president Joe Biden leh a nupui, First Lady Jill Biden ten an sawm angin, June thla hian US a tlawh dawn bawk. US President chuan PM Modi tan hian June 22-ah state dinner a buatsaih dawn tih a lo sawi tawh a ni.