Karnataka CM lakluh inkhawm eptu hruaitu hrang hrangten telpui dawn

Karnataka-a Congress sorkar thar kaihruaitu tur, chief minister leh deputy chief minister tharte chu vawiin hian lakluh an ni dawn a, he hun hi eptu pawlten an inlungrualna lantirna hunah hmangin, state dang aṭangin eptu pawl hruaitu eng emaw zatin telpui an tum.

Congress president Mallikarjun Kharge chuan non-BJP chief minister-te leh, eptu party dang hruaitute chu he hun hmanpui tur hian a sawm a ni. AICC general secretary organisation KC Venugopal pawhin an ngaihdan ṭawmpui thei party hrang hrang hruaitute chu sawm an nih thu a sawi.

Lakluh inkhawm hi Kanteerava Stadium, Bengaluru-ah chhun dar 12:30 ah neih ṭan a ni ang.

May 10-a Karnataka assembly inthlan neihah khan Congress party chuan rorellai BJP paihthlain hnehna an chang a ni. Seat 224 awmna Assembly-ah Congress hian seat 135 lain party malin sorkarna a siam dawn. BJP chuan seat 66 lain, JD(S) in seat 19 an la bawk.

Inthlan result puan aṭanga ni li chhung CM post changtu tur an tihfel theih loh hnuah, Ningani khan Congress chuan Karnataka chief minister thar atan Siddaramaiah leh deputy chief minister atan DK Shivakumar ruat a nih thu a puang a ni. Hemi hnu hian state governor Thaawarchand Gehlot chuan CM leh Dy CM thar turte chu sorkar thar siam tura sawmin, May 20-ah an team member-te nena lakluh turin a ti ta a ni.

Siddaramaiah leh DK Shivakumar-te hian nimin khan Delhi-ah minister tur leh an chanpual pek dan tur chungchangte chu party high command an sawipui nghal bawk.