PM ni loin President zawk hi Parliament building thar hawng tur a ni : Rahul Gandhi

Congress party hruaitu Rahul Gandhi chuan Parliament building thar chu prime minister ni loin, India ram President zawkin a hawng tur a ni, a ti.

Parliament building thar sak hna hi zawhfel tawh niin, May 28 hian prime minister Narendra Modi-a hawntir tum a ni. Kar liam ta Ningani khan Lok Sabha speaker Om Birla chuan PM Modi hi building thar hawng tur hian a sawm niin Lok Sabha Secretariat chuan a tarlang.

Building thar hawn ni atana ruat, May 28 hi Hindutva ideologue VD Savarkar piancham a ni a, hemi ni tak ruat a nih chungchangah eptu party lam chuan BJP sorkar pawh an bei zui bawk. Congress party chuan India ram dintu, founding father-te hmuhsitna a ni, tiin an sawi.

Rahul Gandhi bakah, eptu pawl hruaitu dangte pawhin Parliament building thar chu President hawn tir tur zawk a nih thu an lo sawi ve bawk.

Kum 2020, December 10-a PM Modi-a'n Parliament building thar sakna tur lungphum a phum lai khan, UPA sorkar laia thlan tlin, khatih laia President Ram Nath Kovind sawm a ni lo. Kum 2022, July 11-a building chunga national emblem dah a nih ṭum pawhin Kovind hi sawm a ni lo bawk a ni.

RJD MP Manoj K Jha chuan Parliament building thar chu President hawntir tur a ni lawm ni? tiin a zawt a, CPI general secretary D Raja chuan, "Prime Miniter chu state executive organ hotu a ni a, Parliament chu legislative organ a ni. Ram hotu lu ber a nih angin President Droupadi Murmu in Parliament building thar a hawn hi thil tihawm leh nih dan tur a ni," tiin Modi chu mahni inpholar atchilhah a puh.

Congress general secretary (organisation) KC Venugopal chuan PM Modi chu ram danpui palzut leh, India President zah lo takah a puh. A tih dan ngai pawhin PM chuan ama lam lansarhna tur ngawt a ngaihtuah leh a ni, a ti.