Rs 2,000 note thleng turte tan form leh ID a ngai lo

Sorkar laipuiin Rs 2,000 note tihtawp a tum chungchangah, May 23 aṭangin bank-ah pawisa note hniam zawkin a thleng theih dawn a, Rs 2,000 note thleng/dah luh turte tan hian form emaw, identity proof emaw neih kher a ngai lo tih Reserve Bank of India chuan a sawi.

Mi pakhatin ṭum khata a thleng/dah luh theih zat Rs 20,000-ah bihthliah a ni. Ni khatah vek pawh vawi khat aia tam a thleng/dah lut theih thung ang.

Reserve Bank of India chuan kar liam ta Zirtawpni khan thuchhuah siamin, Clean Note Policy hnuaiah Rs 2,000 note chu siamchhuah a ni tawh dawn lo a, September 30 thleng bank-a account-a dah luh emaw, pawisa note hniam zawka thleng theihna hun hawn a ni dawn tih a sawi. A ṭul dan azirin deadline hi pawhsei rin a ni bawk.

Bank-a Rs 2,000 note thleng turte tan an thleng tumna bank-a customer an nih kher a ngai lo a, an thlengna turah fee engmah pek a ngai lo bawk tih RBI chuan a sawi. Bank hrang hrangte hnenah pawh, pawisa note thleng tur zingah kum upa zawk leh taksa lama rualbanlohna neite tana ruahmanna siamsak turin a hriattir bawk a ni.