Nitish Kumar-a'n Delhi CM Kejriwal hmu

Bihar chief minister leh JD(U) hruaitu Nitish Kumar chuan nimin khan New Delhi-ah Aam Aadmi Party (AAP) hruaitu, Delhi chief minister Arvind Kejriwal chu a chenna inah a hmu.

Nitish Kumar chuan Delhi khawpuai administrative service thununtu chungchanga AAP sorkar leh sorkar laipui inep mekna karah, AAP sokar a thlawp thu a hrilh. Kumar hi a deputy leh RJD hruaitu Tejashwi Yadav-a'n a ṭawiawm.

Delhi sorkar leh sorkar laipuiin adminsitrative service chungchanga thuneihna chu kar liam ta khan Delhi-a mipui thlan sorkar kutah a lo dah tawh a, mahse police, public order and land chungchang a huam tel lo.

Hetih lai hian May 19 khan sorkar laipui chuan IAS leh DANICS cadre officer-te transfer a, an laka disciplinary action latu tur Natoinal Capital Civil Sevice Authority siamna tur ordinance chu a siam a, ordinance hi Parliament in thla ruk chhungin a pawm/nemnghet a ngai ang.

Kejriwal chuan Bill hi Rajya Sabha-a putluh a nih hnuah paihthlak a nih ngei theihna atan eptu party hruaitu hrang hrangte a hmu dawn tih sawiin, Rajya Sabha-a hnawl a nih theih chuan kum 2024 Lok Sabha inthlanpuiah pawh BJP an chak zo dawn tawh lo tih lantirna a ni thei dawn a ni, a ti.

Kumar chuan Supreme Court-in an buaina chungchanga thutlukna a siam tawh hnuah, sorkar laipuiin ordinance a rawn siam leh chu na takin a sawisel a, "Mipuiten an aiawh tura an thlan chhuah sorkar thuneihna chu engvangin in chhuhsak theih," tiin Kejriwal leh a kaihhruai sorkar chuan Delhi tan ṭha takin hna an thawk a, hna thawk thei loa dan an ni tlat chu mak a tih thu a sawi zui bawk.