PM Modi hnenah Fiji leh Papua New Guinea chawimawina sang hlan

Prime minister Narendra Modi chu Fiji leh Papua New Guinea chuan an ram chawimawina sang an hlan.

Prime Minister hian India-Pacific Islands Cooperation (FIPIC) Summit hmanpui turin Pathianni khan Papua New Guinea hi a thleng a, nimin khan heng chawimawina hi hlan nghal a ni.

Fiji prime minister Sitiveni Rabuka chuan an ram chawimawina sang ber, 'The Companio of the Order of Fiji' chu Modi hi a hlan a, he chawimawina hi Fiji hnam ni lo hnenah mi tlemte chauh pek an la nih thu PM Office chuan a sawi nghal bawk.

Papua New Guinea pawhin civil mite hnena chawimawina a pek sang ber, 'Grand Companion of the Order of Logohu (GCL) chu PM Modi hi a hlan bawka, hei hi Pacific Island ramte inpumkhatna atana a hmalakna avanga pe a ni. An ram mi ni lo hnenah mi tlemte chauhin he chawimawina hi an la dawng a ni.

PM Modi hian nimin khan Port Moresby, Papua New Guinea-a FIPIC-3 summit opening session-ah thu sawiin, India chuan FIPIC member-ten hmasawnna hna an thawhna kawnga a theih angin a pui zel dawn tih a sawi.

FIPIC-ah hian member ram 14 - Cook Islands, Fiji, Kiribati, Marshall Islands, Federated States of Micronesia, Nauru, Niue, Samoa, Solomon Islands, Palau, Papua New Guinea, Tonga, Tuvalu leh Vanuatu-te an awm a ni. PM Modi hian summit a hmanpui bakah FIPIC ram hruaitute kawmin thawhhona ṭha zawk siam dan turte a sawipui a, nimin vek khan Australia lam a pan leh nghal a ni. Austrilai-ah hian May 24 thleng a cham ang.