Rs 2,000 note thleng tura intlarte ngaihsak turin RBI in chah

Reserve Bank of India (RBI) chuan Rs 2,000 note tihtawp a tum avanga Bank-a pawisa thleng tura intlarte chu ngaihsak turin bank hrang hrangte a chah.

Central bank chuan, "Nipui lai a nih avangin, bank-te chu pawisa note thleng leh dah luh tuma intlarte chu daihlima a an awmna turte, tui in turte ngaihven sak turin a ngen a ni," a ti.

RBI chuan Rs 2,000 note tihtawp a nih tur thu a puan hnuah, bazar lian leh petrol pump-ten Rs 2,000 note hman tum hi an pung nasa hle. RBI chuan pawm a la ni reng dawn tih sawi mah se, mi tam tak a tichiaia a, bank-a thleng hun rei tak tak intlar ngai ṭhin pumpelh tumin, dawr lian leh petrol pump-ahte tihral an tum a, mahse dawr tam tak chuan an lo dawng duh tawh lo a ni.

Delhi khawpuia petrol pump-te chuan nidanga digital leh card payment an dawn ṭhin laiin, ni hnih chhung chu petrol latute chuan Rs 2,000 tihralna atan an hmang nasa tih sawiin, petrol pump chu bank ang maiin an hmang niin central Delhi-a petrol pump neitu, Anurag Narayanan chuan a sawi. Delhi Petrol Dealers' Association general secretary, Rajeev Jain chuan khawpui chhungah petrol pump 400 vel a awm a, heng hmun zawng zawngahte hian Rs 2,000 note hman tumin intlar an tam thei hle a, ni hnih chhung lekin pawisa lut hi ṭum dang aiin a let li zetin a sang hman tih a sawi.

Rs 2,000 note hi bank hrang hrangah vawiin aṭangin thleng leh dahluh theih a ni dawn a, September 30 thleng hun hawn a ni ang. Mi pakhatin ṭum khatah Rs 20,000 chin a thleng thei dawn a ni.