Delhi HC-in thu zawhfiah turin BBC a ko

Delhi High Court chuan BBC-in kum 2002-a Gujarat intualvuakna thleng chungchanga documentary a siam NGO-in defamation case a thehluh avangin, nimin khan BBC chu thu zawhfiah turin a ko.

BBC documentary, 'India : The Modi Question' hian India hming, judiciary leh prime minister Narendra Modi hming a tichhia tiin, Gujarat-a NGO, Justice for Trial chuan Delhi High Court-ah defamation case hi an thehlut a ni.

Justice Sachin Datta chuan BBC (UK) bakah BBC (India) pawh NGO case thehluh chungchangah chhanna pe turin a hriattir.

NGO aiawh, senior advocate Harish Salve chuan BBC hian an documentary hmang hian India hming a tihliau a, judiciary system pumpui a tihmingchhe bawk a, Prime Minister beihna a ni bawk a ni, a ti.

Hemi hma hian BJP hruaitu Binay Kumar Singh-a defamation case thehluhah, Delhi district court chuan thu zawhfiah turin BBC hi a lo ko tawh bawk. Singh chuan BBC documetary siam hi India sorkar chuan khap chungin, Wikipedia page-ah a entur link a la awm reng bakah, Internet Archive-ah pawh hmuh tur a la awm reng tih a sawi. Hei vang hian BBC, Wikimedia leh Internet Archive-te chu documentary bakah, RSS leh VHP sawichhiatna lam engmah tichhuak tawh lo tura hriattir turin a ngen.