Kapil Sibal-a'n Amit Shah thusawi chhang let

Union home minister Amit Shah-a'n, "Prime minister hmusit chuan ram a hmusit tihna a ni," tia a sawi chu Rajya Sabha MP Kapil Sibal chuan na takin a chhang let a, Prime Minister chu ram a ni lo a, ram tana thawktu zawk a ni, a ti.

Amit Shah hian Ahmedabad-a Modi-a'n national convention a hmanpuinaah Modi surname chungchang avanga Congress hruaitu, Rahul Gandhi MP nihna hnawlsak a nih dante a sawichhuak. "Tuin emaw mi pakhat hmusit taka a sawi a nih chuan buaipui hluai chi a ni lo, a hnam pum ang leh PM meuh a hmusit a nih chuan, ram pum hmuhsitna ang a ni," tiin Rahul Gandhi laka defamation case thehluttu Purnesh Modi chu fakin, an hnam zahawmna atana a beihnaah lawmpuina hlanin, ram pumin an thlawp niin a sawi.

Kapil Sibal chuan Amit Shah thusawi hi a twitter-ah chhang letin, a lo hriat ve dan chuan, PM chu ram tana thawktu zawk niin PM chu ram a ni lo a, hetiang bawkin sorkar chu ram tana thawktu niin sorkar chu ram a ni bawk lo a ni, a ti.