Jail-a tang mek, AAP hruaitu damdawi-inah hruai a ni

Enforcement Directorate (ED) in money laundering case-a a man, Delhi minister hlui, Aam Aadmi Party (AAP) hruaitu Stayendar Jain chu Thawhṭanni khan Delhi-a Safdarjung Hospital-ah hruai a ni.

Satyendar Jain hi nikum May 31 khan ED hian manin, Tihar jail-ah dah a ni. Man a nih hma hian Delhi-a AAP sorkarah health, home, power leh water minister a ni.

Jail-a a tan hnuah kg 35 a hloh hman tih a lawyer chuan a sawi. Tun hnaiah cell-ah amah chauha dah a ni vanga khawhar thlak leh hrehawm a tih thute a sawi a, hei vang hian Tihar jail thuneitute chuan a cell-ah hian tang dang pahnih an dah.

Thla hmasa khan Delhi High Court chuan bail-a chhuah a dilna chu a hnawlsak a, May 18 khan Supreme Court-ah dilna thlen lehin, Court chuan ED hnenah Jain-a dilna siam chungchang a ngaihdan thehlut turin a lo hriattir tawh bawk.

Jain hian hnungzang ruh lama harsatna a neih angin Inrini liam ta khan Deen Dayal Upadhyaya Hospital-ah hruai a ni a, Thawhṭanni khan Safdarjung Hospital-ah hruai leh niin admit a ni. A taksa a chak loin a rihna pawh a tlahniam nasa tawh hle a, AAP chuan BJP chuan Jain hi tihhlum an duh a ni, an ti.

Delhi chief minister Arvind Kejriwal chuan damdawi-ina chair-a Jain-a thu lai thlalak chu a twitter-ah dah langin, a dam ṭhat thuai a duhsak thu a sawi. "Delhi mipuite chuan BJP chetdan rawng tak chu an thlir reng a ni. Hetiang taka midangte hrekbettu hi pathian pawhin a ngaidam lo ang," tiin a sawi zui bawk.