Khuh damdawi thawnchhuah tur kaihhruaina thar siam

India rama khuh damdawi, cough syrup thawnchhuah zinga ṭhenkhatte sawisel an tawh hnuah, sorkar laipui chuan heng damdawi thawnchhuah turte tan kaihhruaina dan thar a siam.

June 1 aṭang chuan cough syrup thawnchhuah turte hian sorkarin laboratory a thlan bikah sample test an paltlang vek a ngai a, hemi hnu hian phalna pek an ni chauh tawh ang.

Directorate General of Foreign Trade (DGFT) chuan kaihhruaina thar siamte a puan rualin, sample test-na tura laboratory thlan bikte hming pawh a tarlang nghal bawk. Laboratory thlante chu - Indian Pharmacopoeia Commission, regional drug testing lab (RDTL - Chandigarh), central drugs lab (CDL - Kolkata), central drug testing lab (CDTL - Chennai Hyderabad, Mumbai), RDTL (Guwahati)] leh state sorkar hnuaia NABL (National Accreditation Board for Testing and Calibration Laboratories) accredited drug testing lab-te an ni.

India rama siam, cough syrup chu nikuma Gambia leh Uzbekistan-a naupang 66 leh 18-te thihna thlen chhanah puh an lo ni tawh a ni. India hian kum 2021-22 khan cough syrup hi USD tld 17 hu a thawnchhuak a, kum 2022-23 ah USD tld 17.6 a thawnchhuak tawh bawk.