Birth leh Death data-te Electoral roll-a thlunzawmna tur bill siam dawn

Union home minister Amit Shah chuan, Parliament session neih leh hunah electoral roll-a birth leh death data thlunzawm tirna tur bill chu pharh tum a ni tih a sawi.

Minister chuan Delhi-a Census building thar a hawnnaah thu sawiin, electoral roll update leh, sorkar scheme hrang hranga hamṭhatna dawng thei tur thlanna kawngah birth leh death registration chu a pawimawh hle tih a sawi.

India ram chhiarpui neih hnuhnun ber chu kum 2011 kha a ni a, kum 10 dana neih ṭhin ni mah se Covid-19 hripui leng vangin kum 2021-ah khan neih theih a ni ta lo a ni. Sorkar laipui chuan chhiarpui neih hun tur hi engmah sawi a la nei lo.

Ministry of home affairs (MHA) chuan kum 2021 khan Registration of Birth and Death Act, 1969 siamṭhat a, database chu Registrar General of India (RGI)-in Population Register, Electoral Register, Aadhar, ration card, passport leh driving licence-te update na atana a hman turin a lo rawt tawh a ni.

Amit Shah chuan, "Prime minister Narendra Modi kaihhruai sorkar chuan ruahmanna a siam dawn a, miin kum 18 a tlin veleh Election Commission chuan voter card a siamsak ang. Thi an awm pawhin, Census registrar chuan a chhungte hnenah a thih thu information a dawng tih hriattirin, a chhungte hian an sawibuai duh chuan ni 15 hun pek an ni ang. Hemi hnuah hian Election Commission chuan voter list aṭangin mitthi hming chu a paih nghal zel tawh dawn a ni," a ti.