Eptu party 19-te chuan Parliament building thar hawnna inkhawm neih tur an boycott dawn tih an sawi. 
Prime minister Narendra Modi-a'n Pathiannia Parliament building thar a hawng tur chu eptu party-te chuan na taka sawiselin, Prime Minister ni loin President zawkin a hawng tur a ni, an ti. Hei bakah hian Hindutva ideology, VD Savarkar piancham ni taka Parliament hawn tum hi an sawisel bawk. 
Eptute chuan President chu ram hotu lu ber a nih mai piah lamah, Parliament-a dinhmun pawimawh tak luahtu, rorel inkhawm ko a, titawp a, member-te hmaa thu sawi ṭhin a nih avangin, Parliament building thar hawngtu tur dik tak zawk a ni, an ti. 
Parliament building thar hawnna inkhawm boycott tur zingah hian Congress, Aam Aadmi Party (AAP), Trinamool Congress, Dravida Munnetra Kazhagam (DMK), the Left, Rashtriya Janata Dal (RJD), Janata Dal-United (JDU), Nationalist Congress Party (NCP), Samajwadi Party leh Uddav Thackeray-a pawl Shiv Sena te an tel. 
Eptu party-te chuan, "Prime Minister Modi-a'n Parliament building thar amah ngeiin hawng tura thutlukna siam a, President Droupadi Murmu dinhmun a luahlanna hi thil zahthlak tak a nih bakah, kan democracy hmusitna a ni bawk a ni. Hei hi President Office hmusitna leh kan ram danpui kalphung bawhchhiatna a ni bawk," tiin an sawi. Hemi rual hian democracy kalphung lo taka thiltih ṭhin chu Prime Minister tan chuan thil thar a ni tawh lo a ni, an ti. "Parliamen-a eptu member-te chu India ram mipuite tana an auchhhuah avanga ban, hrem leh an thusawite tihtawp sak an ni fo a ni. Parliament aṭangin democracy laimu paihchhuah a nih tawh hnuah, building thar neih pawh hi a hlutna kan hre lo a ni," tiin an tarlang. 
Hetih lai hian parliamentary affairs minister Pralhad Joshi chuan eptu party 19-te chu Parliament building thar hawnna boycott an tum chu ngaihtuah ṭha leh turin a ngen. Joshi chuan Lok Sabha speaker chu Parliament chungchanga mawhphurhna latu niin, Speaker hian building thar hawng turin PM hi a sawm a ni, a ti. Parliament building thar hawn tur chu India ram tana thil chhinchhiahtlak a nih thu leh, he thil hi politics nena inkaihhnawih tir lo turin a ngen bawk.