Rahul Gandhi-a'n passport pangngai dil dawn

Congress hruaitu, Rahul Gandhi chuan Parliament member a nihna hlihsak a nih hnua MP a nih anga diplomatic passport a neih chu sorkarah thehlutin, passport pangngai (ordinary passport) a dil dawn.

Gandhi hian passport pangngai a dil theihna turin Thawhlehni khan Delhi court-ah 'no objection certificate' pe turin a ngen a, a dilna hi court chuan naktukah a ngaihtuah ang. Gandhi-a adovate, Tarannum Cheema chuan Conress hruaitu hian criminal case engmah a neih loh avangin, NOC pe tur hian court chu a ngensak a ni.

Hetih lai hian National Herald case-ah Gandhi hi inhnamhnawiha puh zingah a tel a, hei vang hian BJP hruaitu Subramanian Swamy chuan passport a dilna hi court-ah a lo dodal thung. Swamy chuan National Herald case hi tihkhawtlai mek a ni rih a, hetichunga Gandhi hi ram pawna zinchhuah phalsak a nih chuan he case chhui hna hi a tibahlah thei a ni, a ti.